ຊົມເຊີຍ! ມາດາມ ໂບ ພິຈິກາ ບຸນກວ້າງ ອະດີດ ປະທານສະໂມສອນ ວຽງຈັນ ຢູໄນເຕັດ.

ຊົມເຊີຍ! ມາດາມ ໂບ ພິຈິກາ ບຸນກວ້າງ ອະດີດ ປະທານສະໂມສອນ ວຽງຈັນ ຢູໄນເຕັດ, ອອກມາປະກາດຜ່ານທາງເຟສບຸກສ່ວນຕົວວ່າ: ຕົນຈະອັດສີດ 40 ລ້ານກີບ ໃຫ້ U23 ລາວ, ຖ້າທີມຊາດລາວ ຊຸດ U23 ປີ ຊະນະ ທີມຊາດໄທ ໃນຕອນແລງຂອງວັນທີ 24 ກຸມພາ 2022 ນີ້.
ມາດາມ ໂບ ຍັງບອກອີກວ່າ: ອ້າຍ Aekaphonl Phoumin ຈະໃຫ້ອີກ 10 ລ້ານກີບ ລວມເປັນ 50 ລ້ານກີບ.
ຢູ-23 ລາວ ຈະລ່າຝັນສຳເລັດໄດ້ ຫຼື ບໍ່ ໃນເກມທີ່ຈະພົບ ຢູ-23 ໄທ ມື້ອື່ນນີ້ ?
ຫຼັງຈາກຂຸນພົນນັກເຕະ ຢູ-23 ປີ ຈາກດິນແດນລ້ານຊ້າງ ສປປ ລາວ ສ້າງປະຫວັດສາດໜ້າໃໝ່ໄດ້ສຳເລັດ ໃຫ້ກັບວົງການກິລາລາວ ເວົ້າລວມ ແລະ ເວົ້າສະເພາະ ວົງການບານເຕະ ດ້ວຍການເອົາຊະນະ ຢູ-23 ທີມຊາດມາເລເຊຍ ໄດ້ທັງຂາໄປ ແລະ ກັບ ລວມຜົນປະຕູ 4-1 ກາຍເປັນແຊ໋ມໃນກຸ່ມບີ ພ້ອມທັງຄວ້າໂຄຕ້າເຂົ້າຮອບຮອງຊະນະເລີດ ໂດຍຈະໂຄຈອນໄປພົບກັບ ຢູ-23 ທີມຊາດໄທ ທີ່ມາເປັນອັນດັບສອງ ຂອງກຸ່ມຊີ ໃນລາຍການເຕະບານຊີງແຊ໋ມອາຊຽນ ຮຸ່ນອາຍຸບໍ່ເກີນ 23 ປີ (AFF U23 Championship 2022) ຊຶ່ງເກມໃນຮອບຮອງ ຫຼື ຕັດເຊືອກຂອງທີມຊາດລາວ ແລະ ໄທ ຈະມີຂຶ້ນໃນເວລາ 16:00 ໂມງ ຂອງວັນທີ 24 ກຸມພາ 2022 ທີ່ສະໜາມມໍຣະດົກ ເຕໂຊ ສະເຕດ້ຽມ, ນະຄອນຫຼວງພະນົມເປັນ, ປະເທດກຳປູເຈຍ. ສ່ວນອີກຄູ່ໜຶ່ງ ຈະເປັນການພົບກັນ ລະຫວ່າງ ທີມຊາດຫວຽດນາມ ແຊ໋ມກຸ່ມຊີ ຈະພົບກັບ ອັນດັບໜຶ່ງຂອງກຸ່ມເອ ກໍຄື ຕີມໍ ເລດເຕ ໃນເວລາ 19:30 ໂມງ.
ແຕ່ກ່ອນຈະເຖິງຮອບຮອງຊະນະເລີດນີ້, ທີມຊາດລາວ ຖືກປະເມີນຈາກສື່ມວນຊົນຫຼາຍປະເທດທີ່ເຂົ້າຮ່ວມ ພ້ອມທັງນັກສັນທັດກໍລະນີ ຫຼື ເວົ້າຕາມພາສາກິລາກໍວ່າ “ຊຽນບານ” ທັງຫຼາຍທັງປວງວ່າ ທີມຊາດລາວ ຄົງຈະຈອດແຕ່ຮອບທຳອິດ ຫຼື ຮອບແບ່ງກຸ່ມອີກຕາມເຄີຍ ເນື່ອງຈາກໃນກຸ່ມບີທີ່ລາວເຮົາຢູ່ຮ່ວມ ເບື້ອງຕົ້ນມີທັງແຊ໋ມເກົ່າ ອິນໂດເນເຊຍ, ມຽນມາ ແລະ ມາເລເຊຍ ຊຶ່ງຖືວ່າແຕ່ລະທີມລ້ວນແຕ່ສາຫັດສາກັນ ຫຼື ເສືອ-ສິງ-ກະທິງ-ແຮດ ທັງນັ້ນ! ແຕ່…ຈະເອີ້ນວ່າເປັນຄວາມໂຊກດີຂອງທີມຊາດລາວກໍວ່າໄດ້ ເນື່ອງຈາກທັງ ອິນໂດເນເຊຍ ແລະ ມຽນມາ ພ້ອມໃຈກັນຖອນຕົວ ເນື່ອງຈາກໃນທີມມີນັກກິລາຕິດໂຄວິດ-19 ຫຼາຍຄົນ ອັນໄດ້ເຮັດໃຫ້ທີມຊາດລາວ ເລີ່ມແນມເຫັນແສງສະຫວ່າງ ທີ່ປາຍອຸໂມງ ຕັ້ງແຕ່ບັດນັ້ນມາ!
ແລະ…ປາກກາຊຽນທັງຫຼາຍທັງປວງ ກໍຕ້ອງຫັກສະບັ້ນລົງ ຫຼັງຈາກໃນເກມທຳອິດ ທີມຊາດລາວ ສາມາດກັບມາພິກແຊງເອົາຊະນະມາເລເຊຍໄດ້ແບບພິກຄວາມຄາດໝາຍ ແບບບໍ່ຢາກເຊື່ອສາຍຕາຂອງແຟນບານທັງຊາວລາວ ແລະ ມາເລເຊຍ ດ້ວຍຜົນ 2 ປະຕູຕໍ່ 1 ໂດຍສະເພາະຫຼັງຈາກຖືກມາເລເຊຍ ຍິງນຳໄປກ່ອນ 1 ປະຕູຕໍ່ 0 ໃນເຄິ່ງເວລາທຳອິດ. ຈາກຜົນຂອງການແຂ່ງຂັນນັດນີ້ ເຊື່ອວ່າມັນໄດ້ເຮັດໃຫ້ຂວັນ ແລະ ກຳລັງໃຈຂອງທັບນັກເຕະທີມຊາດລາວ ມີເພີ່ມຂຶ້ນເປັນທະວີຄູນ ແລະ ມີຄວາມຫວັງທີ່ຈະຜ່າຟັນໃຫ້ໄດ້ເຂົ້າຮອບຮອງຊະນະເລີດເປັນປະຫວັດສາດຂອງຊາດ ຊຶ່ງໃນທີ່ສຸດພວກເຂົາກໍເຮັດໄດ້ ດ້ວຍການຢໍ້າແຄ້ນມາເລເຊຍໄດ້ອີກ 2 ປະຕູຕໍ່ 0 ໃນເກມນັດທີສອງ ພ້ອມທັງສົ່ງທີມຊາດມາເລເຊຍກັບບ້ານ ດ້ວຍສະຖິຕິທີ່ບໍ່ຢາກຈົດຈຳສຳລັບພວກເຂົາເລີຍ!
ສະນັ້ນ, ມາຮອດຕອນນີ້ “ໂຄສົກ” ກ້າເວົ້າໄດ້ວ່າທີມຊາດລາວ ຢູ-23 ມາຄັ້ງນີ້ ຫອບທັງຄວາມເກັ່ງ ແລະ ເຮັງ ມານຳພ້ອມ! ຄວາມເກັ່ງກໍຄື ເອົາຊະນະມາເລເຊຍໄດ້ ທັງໄປ ແລະ ກັບແບບນີ້ ມັນບໍ່ແມ່ນເລື່ອງບັງເອີນ ຫຼື “ຟຸກ” ຕາມພາສາກິລາໃຊ້ກັນແຕ່ຢ່າງໃດ. ທຸກປະຕູທີ່ເຮັດໄດ້ ລ້ວນແຕ່ມາຈາກການສ້າງສັນເກມເຂົ້າໃສ່ທັງນັ້ນ (ໂອເພັນ ເພຼ). ນອກນັ້ນຍັງມີລູກມະຫັດສະຈັນຂອງນັກເຕະໝາຍເລກ 17 “ບຸນພະຈັນ ບຸນກອງ” ທີ່ເປັນທີ່ເດັດຂອງທີມຊາດລາວຊຸດນີ້ ແລະ ກໍບໍ່ມີໃຜກ້າປະຕິເສດໄດ້ລົງວ່າ ຜົນງານທັງໝົດທັງປວງ ກະຍ້ອນມີຄູຝຶກໃໝ່ຊາວເຢຍລະມັນຄົນເກັ່ງຢູ່ເບື້ອງຫຼັງ ນັ້ນກໍຄື ມິດສະເຕີ “ໄມເຄິ້ນ ໄວ” ທີ່ສາມາດແກ້ເກມໃນທຸກໆນັດ ໄດ້ດີເປັນເລີດນັ້ນເອງ!
…ໃນການໂຄຈອນມາພົບກັບທີມຊາດໄທ ຮອບຮອງແລງມື້ອື່ນນີ້ ຖືໄດ້ວ່າທີມຊາດລາວ ຈະພົບກະດູກຕອນໃຫຍ່ ໄຊ້ ສອງເອັກແອວ (2XL) ເລີຍກໍວ່າໄດ້ ເນື່ອງຈາກທີມຊາດໄທ ກໍຖືກຍົກໃຫ້ເປັນເຕັງອີກທີມໜຶ່ງໃນລາຍການນີ້ ເຖິງຈະບອກວ່າ ເຂົາຂົນເອົານັກເຕະຮຸ່ນອາຍຸ 19 ປີ ມາເປັນສ່ວນໃຫຍ່ກໍຕາມ ແຕ່ກໍຕ້ອງຍອມຮັບວ່ານັກກິລາທີມຊາດພວກເຂົາທຸກຊຸດ ແມ່ນເຕັມໄປດ້ວຍຄຸນນະພາບ ແລະ ປະສົບການ, ເຫັນໄດ້ຈາກສອງເກມທີ່ເຂົາພົບກັບທີມຊາດສິງກະໂປ ໂດຍເອົາຊະນະໄດ້ 3-1 ແລະ ໃນເກມທີ່ເສຍໃຫ້ຫວຽດນາມ 0-1, ນັກກິລາແຕ່ລະຄົນຂອງເຂົາຂ້ອນຂ້າງມີຄວາມນິ້ງ, ທຸ່ນທ່ຽງ, ມີວິໄນ ແລະ ທີມເວີກທີ່ດີສົມຄວນ.
…ແນວໃດກໍຕາມ, ໃນເກມນີ້ “ໂຄສົກ” ຍັງໝັ້ນໃຈໃນສັກກະຍະພາບຂອງທີມຊາດລາວຊຸດນີ້ຢູ່ວ່າມີໂອກາດທີ່ຈະຫັກປາກກາຊຽນໄດ້ອີກເປັນຄັ້ງທີສອງ! ຂໍພຽງແຕ່ພາວະນາໃຫ້ນັກກິລາທຸກຄົນ ຍັງຢູ່ໃນສະພາບສົມບູນ ມີຄວາມຟິດ ແລະ ບໍ່ຕິດໂຄວິດ-19 ກ່ອນການແຂ່ງຂັນກໍພໍ ໂດຍສະເພາະ ພະເອກຂອງທີມ “ບຸນພະຈັນ ບຸນກອງ” ຂາດຄົນນີ້ບໍ່ໄດ້ແທ້ໆ ຈະເອີ້ນວ່າເປັນຫົວໃຈຂອງທີມຊຸດນີ້ເລີຍກໍວ່າໄດ້ ເພາະນອກຈາກຈະມີປະສົບການສູງ, ມີເບສິກລົ້ນຕົວແລ້ວ ພ້ອມຍັງມີພິດສົງຮອບຕົວອີກ ໂດຍສະເພາະມີຄວາມຄົມເປັນເລີດ ໃນການເຂົ້າທຳປະຕູ ແມ່ນແຕ່ສື່ປະເທດເພື່ອນບ້ານ ທັງຫວຽດນາມ ແລະ ໄທ ຍັງຊົມຕິດປາກ. ແຕ່ກໍໜ້າເປັນຫ່ວງວ່າ ບຸນພະຈັນ ຄົງຈະຖືກເຂົາໝາຍຫົວ ແລະ ຈັບຕາຍໃນເກມທີ່ຈະພົບກັບທີມຊາດໄທມື້ອື່ນນີ້ ຢ່າງຫຼີກຫຼ່ຽງບໍ່ໄດ້!
ສຸດທ້າຍ, ຕ້ອງຝາກຄວາມຫວັງໄວ້ກັບການແກ້ເກມຂອງຄູຝຶກ “ໄມເຄິ້ນ ໄວ” ວ່າທ່ານຈະມີແຜນດີທີເດັດ ຜະເດັດເສິກທີມຊາດໄທໄດ້ແນວໃດ ເພື່ອພາທີມຊາດລາວ ລ່າຝັນໄດ້ເຂົ້າຮອບຊີງຊະນະເລີດສຳເລັດ!
…ຊະນະ ຫຼື ເສຍ ຖືວ່າເປັນເລື່ອງປົກກະຕິຂອງເກມກິລາ ແຟນບານຮັບໄດ້ສະເໝີ ຂໍພຽງແຕ່ໃຫ້ທຸກຄົນສູ້ເຖິງທີ່ສຸດ, ຂໍໃຫ້ຄິດສາວ່າ ປະຊາຊົນລາວ ທັງ 7 ລ້ານຄົນ ພ້ອມທີ່ຈະສົ່ງກຳລັງໃຈໄປໃຫ້ ແລະ ຂະນະດຽວກັນ ກໍກຳລັງລໍຖ້າຟັງຂ່າວດີຈາກພວກເຈົ້າອີກຄັ້ງໜຶ່ງ.
…ຂໍອວຍພອນໃຫ້ທີມຊາດລາວ ຢູ-23 ໂຊກດີມີໄຊ…ຈຳໄວ້ວ່າ ຖ້າຊະນະໄດ້ນັດນີ້ ເຊື່ອວ່າຄົນລາວທັງປະເທດ ຈະຈົດຈຳພວກເຈົ້າ ແລະ ກ່າວຂານເຖິງໄປນານແສນນານ ຮອດຊົ່ວລູກຊົ່ວຫຼານ ພຸ້ນລະ! ລາວສູ້ໆ!
ຂອບໃຈຄໍລໍ້າໂດຍ: ຄົນຂ້າງສະໜາມ ນສພ ກິລາ.
ຮູບພາບຈາກ: Lao Football Federation

Leave a Reply

Your email address will not be published.