ເອກອັກຄະຣາສະທູດ ແຫ່ງຣາຊະອານາຈັກໄທ ຢ້ຽມຢາມ ແລະ ເຮັດວຽກຢູ່ໂຮງຮຽນສາມັນກີນນອນຊົນເຜົ່າແຂວງອຸດົມໄຊ

#ເອກອັກຄະຣາສະທູດ ແຫ່ງຣາຊະອານາຈັກໄທ ຢ້ຽມຢາມ ແລະ ເຮັດວຽກຢູ່ໂຮງຮຽນສາມັນກີນນອນຊົນເຜົ່າແຂວງອຸດົມໄຊ

ໃນວັນທີ່ 22 ກຸມພາ 2022 ນີ້ ທີ່ໂຮງຮຽນສາມັນກີນນອນຊົນເຜົ່າແຂວງອຸດົມໄຊ ໄດ້ຕ້ອນຮັບທ່ານ ເຈດສະດາ ກະຕະເວທິນ ເອກອັກຄະຣາສະທູດ ແຫ່ງຣາຊະອານາຈັກໄທ ປະຈຳນະຄອນຫຼວງວຽງຈັນ ພ້ອມດ້ວນຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງອຸດົມໄຊ ໂອກາດດັ່ງກ່າວທ່ານໄດ້ໄປຢ້ຽມຢາມ ແລະ ເຮັດວຽກຢູ່ໂຮຽນສາມັນກີນນອນຊົນເຜົ່າແຂວງອຸດົມໄຊ ໂດຍມີທ່ານ ສົມສັກ ສຸພິໄລ ຫົວໜ້າພະແນກສຶກສາທິການ ແລະ ກິລາ, ມີອຳນວຍການໂຮງຮຽນ ພ້ອມດ້ວຍຄະນະ ແລະ ພະແນກການທີ່ກ່ຽວຂ້ອງເຂົ້າຮ່ວມ.

ການມາຢ້ຽມຢາມຂອງທ່ານທູດພ້ອມດ້ວຍຄະນະຄັ້ງນີ້ ແມ່ນໄດ້ຮັບຟັງການລາຍງານກ່ຽວກັບວຽກງານຕ່າງໆໂດຍສະເພາະແມ່ນວຽກງານການຮ່ວມມື ແລະ ຊ່ວຍເຫຼືອຈາກປະເທດໄທທີ່ມີຕໍ່ວຽກງານການສຶກສາ ຢູ່ແຂວງອຸດົມໄຊ ໂດຍສະເພາະແມ່ນໂຮງຮຽນສາມັນກີນນອນຊົນເຜົ່າ ທີ່ໄດ້ຮັບການຊ່ວຍເຫຼືອຈາກໂຄງການຂອງພະເທບ ເຊັ່ນ: ການຊ່ວຍເຫຼືອສ້າງອາຄານຮຽນ ເຄື່ອງອອກກຳລັງກາຍ, ໂຄງການອາຫານທ່ຽງ, ແລະ ການພັດທະນາທາງດ້ານບຸກຄະລາກອນ ຄູອາຈານ ທີ່ໄດ້ຮັບທືນໄປຍົກລະດັບທາງດ້ານວິຊາສະເພາະຢູ່ໃນເທດໄທ,

ໂອກາດດັ່ງກ່າວ ຄະນະທູດຍັງໄດ້ທ່ຽວຊົມຫ້ອງວາງສະແດງເຄື່ອງນຸ່ງຂອງບັນດາເຜົ່າທີ່ນັກຮຽນມອບໃຫ້ເປັນຂອງຂັວນຈາກໂຮງຮຽນ, ທ່ຽວຊົມອາຄານຮຽນຂອງພະເທບ ທີ່ໄດ້ຊ່ວຍເຫຼືອໃນການກໍ່ສ້າງ, ຊົມຜັກສວນຄົວຂອງໂຮງຮຽນ, ອາຄານຮຽນຕ່າງໆ.

ໂອກາດດັ່ງກ່າວ ເອກອັກຄະຣາສະທູດ ແຫ່ງຣາຊະອານາຈັກໄທ ພ້ອມດ້ວຍຄະນະຍັງໄດ້ນຳເອົາເສື້ອກັນໜາວມາມອບໃຫ້ນັກຮຽນສາມັນກີນນອນຊົນເຜົ່າຈຳນວນໜື່ງຕື່ມອີກ.
ຖ່າຍຮູບ: Khamlai Tahap
ຂ່າວໂດຍ:ແສງອາທິດ
ກວດແກ້ໂດຍ: ດາວອນ ສີວິໄລ

Leave a Reply

Your email address will not be published.