ກຽມປະກາດຮັບຮອງເອົາຫໍໄຕປີດົກ 238 ປີວັດ ສີມຸງຄຸນ ແຂວງ ສາລະວັນ ເປັນມໍລະດົກແຫ່ງຊາດລະດັບທ້ອງຖິ່ນໃນໄວໆນີ້ 🇱🇦🇱🇦

ກຽມປະກາດຮັບຮອງເອົາຫໍໄຕປີດົກ 238 ປີວັດ ສີມຸງຄຸນ ແຂວງ ສາລະວັນ ເປັນມໍລະດົກແຫ່ງຊາດລະດັບທ້ອງຖິ່ນໃນໄວໆນີ້ 🇱🇦🇱🇦

ຫໍໄຕປີດົກ ວັດສີມຸງຄຸນ (ວັດກາງ) ທີ່ຕັ້ງຢູ່ບ້ານວັດກາງ, ເມືອງ ສາລະວັນ, ແຂວງ ສາລະວັນ ຈະໄດ້ຮັບການປະກາດເປັນມໍລະດົກແຫ່ງຊາດລະດັບທ້ອງຖິ່ນ ພາຍໃນຕົ້ນເດືອນເມສາ 2022 ເຊິ່ງອົງການປົກຄອງ ແຂວງ ຈະຈັດໃຫ້ມີຫຼາຍກິດຈະກໍາສໍາຄັນທີ່ຕິດພັນກັບການສົ່ງເສີມການທ່ອງທ່ຽວ ໂດຍສະເພາະລາວທ່ຽວລາວ.
.
ທ່ານ ສົມໃຈ ອຸ່ນຈິດ, ຮອງເຈົ້າແຂວງ, ຜູ້ຊີ້ນໍາວຽກງານວັດທະນະທໍາ-ສັງຄົມ ແຂວງ ສາລະວັນ ໃຫ້ສໍາພາດວ່າ: ຫໍໄຕປີດົກຂອງແຂວງສາລະວັນ ສ້າງຂຶ້ນມາໄດ້ 238 ປີແລ້ວ (ສ້າງຂຶ້ນໃນປີ 1784) ຖືເປັນມໍລະດົກມິ່ງ ມືອງທີ່ຊົງຄຸນຄ່າຂອງ ແຂວງສາ ລະວັນ ເຊິ່ງຖືກຝູງບິນ T28 ຂອງຈັກກະພັດອາເມລິກາຍິງທໍາລາຍໃນຊຸມປີ 1970 ເຮັດໃຫ້ໄດ້ຮັບຄວາມເສຍຫາຍໜັກສົມຄວນ ຈາກນັ້ນໃນປີ 2009 ອົງການປົກຄອງແຂວງໄດ້ຕົກລົງໃນການກໍ່ສ້າງ ແລະ ປະຕິສັງຂອນຫໍໄຕປີດົກຄືນໃໝ່ ເປັນຕົ້ນ: ການກໍ່ສ້າງກົມມະລຽນອ້ອມຂ້າງຫໍໄຕ, ກໍ່ສ້າງຫໍປະດິດສະຖານເສົາຫໍໄຕຫຼັງເກົ່າທີ່ຍັງງເຫຼືອຈາກການທໍາລາຍຂອງເຮືອບິນເຊີ່ງຫໍໄຕຫຼັງເກົ່າທີ່ມີອາຍຸ 200 ກວ່າປີ ຍັງເຫລືອ 29 ຕົ້ນ ແລະ ອື່ນໆ ເຊິ່ງມາຮອດປັດຈຸບັນໄດ້ສໍາເລັດຮຽບຮ້ອຍແລ້ວ.
.
ຂະນະທີ່ອົງການປົກຄອງ ແຂວງ ພວມສົມທົບກັບກະຊວງຖະແຫຼ່ງຂ່າວ, ວັດທະນະທໍາ ແລະ ທ່ອງທ່ຽວ ກະກຽມຈັດພິທີປະກາດຮັບຮອງເອົາຫໍໄຕປີດົກ ວັດສີມຸງຄຸນ ເປັນ ມໍລະດົກແຫ່ງຊາດທາງດ້ານວັດທະນະທໍາລະດັບທ້ອງຖິ່ນ ໂດຍຄາດວ່າຈະຈັດຂຶ້ນໃນລະຫວ່າງວັນທີ 5-9 ເມສາ 2022.
.
ທ່ານຮອງເຈົ້າແຂວງ ໃຫ້ຮູ້ຕື່ມວ່າ: ສໍາລັບກິດຈະກໍາທີ່ຈະຈັດຂຶ້ນໃນໂອກາດປະ ກາດຮັບຮອງເອົາຫໍໄຕປີດົກ ວັດສີມຸງຄຸນ ເປັນມໍລະດົກແຫ່ງຊາດລະດັບທ້ອງຖິ່ນໃນຄັ້ງນີ້ ມີຫຼາຍຢ່າງເປັນຕົ້ນ: ງານວາງສະແດງສິນຄ້າຂອງປະຊາຊົນ ພາຍໃນແຂວງ, ການປະກວດນັກຮຽນ-ໝໍລໍາ, ການແຫ່ພະໄຕປີດົກ-ໜັງສືຜູກໃບລານ, ແຫ່ຫໍຜາສາດເຜີ້ງ ແລະ ອື່ນໆ ເພື່ອສ້າງຄວາມເບີກບານມ່ວນຊື່ນ ກໍຄື ດຶງດູດນັກທ່ອງທ່ຽວເຂົ້າໄປທ່ອງທ່ຽວ ແຂວງ ສາລະວັນ ໃຫ້ຫຼາຍຂຶ້ນກວ່າເກົ່າ ແລະ ເປັນການປະກອບສ່ວນສໍາຄັນເຮັດໃຫ້ຫໍໄຕແຫ່ງນີ້ກາຍເປັນຄັງຄວາມຮູ້ທາງດ້ານພຸດທະສາສະໜາ ແລະ ເປັນສະຖານສະສົມ ຫຼື ເກັບຮັກສາໄວພະໄຕປີດົກ-ໜັງສືຜູກໃບລານຄົງຢູ່ຄູ່ກັບຊາວພຸດທະສາສະໜາຕະຫຼອດໄປ.
.
.
.
————————————-
ທີ່ມາຂໍ້ມູນ ເເລະ ຮູບພາບ: Lao National Radio

Leave a Reply

Your email address will not be published.