ສະໜອງທຶນກໍ່ສ້າງສູນໄອຊີທີ ໃນເນື້ອທີ່ 5,500 ກວ່າຕາແມັດໃຫ້ລັດຖະບານລາວ

ລັດຖະບານຈີນ ສະໜອງທຶນກໍ່ສ້າງສູນຝຶກອົບຮົມດ້ານໄອຊີທີ ເພື່ອຍົກລະດັບສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ເຊິ່ງພິທີເຊັນສັນຍາໄດ້ຈັດຂື້ນໃນວັນທີ 11 ມີນານີ້, ຝ່າຍລາວລົງນາມໂດຍທ່ານ ປະດັບໄຊ ໄຊຍະໂຄດ, ຮອງຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະ ຕາງໜ້າຝ່າຍຈີນໂດຍທ່ານນາງ ປາລິດາ(LI YAN), ຕາງໜ້າກຸ່ມບໍລິສັດກໍ່ສ້າງທາງລົດໄຟຈີນ ຈໍາກັດ ໂດຍເປັນສັກຂີພະຍານຈາກ ທ່ານ ສັນຕິສຸກ ສິມມາລາວົງ ຮອງລັດຖະມົນຕີກະຊວງ ເຕັກໂນໂລຊີ ແລະການສື່ສານ, ທ່ານ ຈ້າວ ເວີນຢູ (ZHAO WENYU) ທີ່ປຶກສາເສດຖະກິດການຄ້າ ສະຖານທູດຈີນປະຈໍາລາວ
ທ່ານ ປະດັບໄຊ ໄຊຍະໂຄດກ່າວວ່າ: ໂຄງການນີ້ສ້າງຂຶ້ນເພື່ອຊ່ວຍຍົກລະດັບສະຖາບັນເຕັກໂນໂລຊີການສື່ສານຂໍ້ມູນຂ່າວສານ ໃຫ້ກາຍເປັນສະຖາບັນໜຶ່ງທີ່ຊ່ວຍສ້າງ ແລະພັດທະນາບຸກຄະລາກອນໃນຂະແໜງເຕັກໂນໂລຊີ ແລະການສື່ສານ ເພື່ອຕອບສະໜອງໃຫ້ແກ່ແຜນພັດທະນາເສດຖະກິດດິຈິຕອນ ແຫ່ງຊາດຂອງປະເທດລາວ.
ຕາມຂໍ້ມູນໃຫ້ຮູ້ວ່າ: ໂຄງການກໍ່ສ້າງສູນດັ່ງກ່າວຈະເປັນອາຄານ 5 ຊັ້ນຈຳນວນ 1 ຫຼັງ, ມີເນື້ອທີ່ທັງໝົດ 5,500ກວ່າຕາແມັດ, ປະກອບດ້ວຍຫ້ອງຮຽນທຳມະດາ, ຫ້ອງຮຽນທັນສະໄໝ, ຫ້ອງທົດລອງ, ຫ້ອງການ, ຫ້ອງສະໝຸດ, ຫ້ອງປະຊຸມ… ໂຄງການຊ່ວຍເຫຼືອດັ່ງກ່າວຍັງຈະໄດ້ສະໜອງອຸປະກອນການຮຽນ-ການສອນທີ່ຈຳເປັນ ລວມເຖິງການສົ່ງຜູ້ບໍລິຫານ, ຄູອາຈານ ແລະນັກສຶກສາຈໍານວນໜື່ງເຂົ້າຮ່ວມການຝຶກອົບຮົມທີ່ ສປ ຈີນ ເພື່ອກຽມພ້ອມຮອງຮັບໃນການເປີດສູນ.
ໂຄງການນີ້, ໄດ້ມີການສໍາຫຼວດຄວາມເປັນໄປໄດ້ໂດຍ ສະຖາບັນອອກແບບວິສະວະກໍາເອເລັກໂຕຣນິກ ສປ ຈີນເມື່ອກາງປີ 2019ຜ່ານມາ ແລະຈະດໍາເນີນການກໍ່ສ້າງໂດຍກຸ່ມບໍລິສັດກໍ່ສ້າງທາງລົດໄຟແຫ່ງປະເທດຈີນຈໍາກັດ ພາຍໃນ 20 ເດືອນ ຄາດຄະເນວ່າຈະເລີ່ມການກໍ່ສ້າງໃນທ້າຍເດືອນ ມີນາ ປີ 2022 ແລະຈະສຳເລັດການກໍ່ສ້າງ ແລະສົ່ງມອບໂຄງການໃນທ້າຍເດືອນ ພະຈິກ 2023.
ຂໍ້ມູນ ແລະ ຮູບພາບ: CRI

Leave a Reply

Your email address will not be published.