ຊົມເຊີຍ.!!!ອົງການອາຫານໂລກ ເປີດໂຄງການ ອາຫານທ່ຽງໃນໂຮງຮຽນ ໄລຍະໃໝ່

ອົງການອາຫານໂລກ ເປີດໂຄງການ
ອາຫານທ່ຽງໃນໂຮງຮຽນ ໄລຍະໃໝ່
ຂປລ. ໃນວັນທີ 22 ມີນາ 2022 ນີ້, ອົງການອາຫານໂລກ ຈັດພິທີເປີດ ໂຄງ ການອາຫານທ່ຽງໃນໂຮງຮຽນໄລຍະໃໝ່ ຢ່າງເປັນທາງການ ຢູ່ເມືອງສັງທອງ ນະຄອນ ຫລວງວຽງຈັນ ໂດຍມີ ທ່ານນາງ ຂັນທະລີ ສິລິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ປີເຕີ ເຮມອນ ເອກອັກຄະລັດຖະທູດສະຫະລັດອາເມລິກາ ປະຈຳ ສປປ ລາວ ເຊິ່ງໂຄງການດັ່ງກ່າວ ໄດ້ຮັບກນສະໜັບສະໜູນຈາກ ລັດຖະບານສະຫະລັດ ອາເມລິກາ ທີ່ຈັດຕັ້ງປະຕິບັດໂດຍ ອົງການອາຫານໂລກ ເພື່ອສະໜັບສະໜູນວຽກງານອາຫານທ່ຽງໃນໂຮງຮຽນ ຂອງລັດຖະບານແຫ່ງ ສປປ ລາວ, ມີນັກຮຽນຊັ້ນປະຖົມ ປະມານ 64.000 ຄົນຈາກ 707 ໂຮງຮຽນ ໃນ 17 ເມືອງເປົ້າໝາຍບຸລິມະສິດ ຂອງ 11 ແຂວງໃນທົ່ວປະເທດ ທີ່ກໍານົດໂດຍ ກະຊວງສຶກສາທິການ ແລະ ກິລາ ທີ່ຈະໄດ້ຮັບອາຫານທ່ຽງທີ່ມີໂພຊະນາການທຸກໆມື້.
ທ່ານນາງ ຂັນທະລີ ສິລິພົງພັນ ໄດ້ໃຫ້ຮູ້ວ່າ: ລັດຖະບານ ກໍຄື ກະຊວງສຶກສາທິການ ແລະ ກິລາ ໄດ້ສຸມທຸກຄວາມພະຍາຍາມໃນການພັດທະນາການສຶກສາ ແລະ ກິລາ, ພັດທະນາຊັບພະຍາກອນມະນຸດໃຫ້ມີຄຸນນະພາບ ໂດຍສະເພາະ ແຜນງານສົ່ງເສີມອາ ຫານທ່ຽງໃນໂຮງຮຽນ ກໍແມ່ນໜຶ່ງໃນແຜນພັດທະນາການສຶກສາ ແລະ ກິລາ. ຜ່ານການຈັດຕັ້ງປະຕິບັດໂຄງການການອາຫານທ່ຽງເກືອບ 20 ປີ ທີ່ຜ່ານມາ ພວກເຮົາໄດ້ຮຽນຮູ້ ແລະ ເຫັນໄດ້ຜົນສຳເລັດຢ່າງຈະແຈ້ງ ຈາກການຈັດຕັ້ງປະຕິບັດໂຄງການຂອງບັນດາເມືອງ, ແຂວງ ໃນການປ່ຽນແປງອັດຕາການເຂົ້າຮຽນລວມ, ອັດຕາປະລະ, ອັດຕາຄ້າງຫ້ອງຂອງເດັກ/ນັກຮຽນອະນຸບານ ແລະ ນັກຮຽນຊັ້ນປະຖົມສຶກສາ ລວມທັງແກ້ໄຂບັນຫາໂພຊະນາການ, ບັນຫາສຸຂະພາບ, ການຮຽນຮູ້ຂອງເດັກ/ນັກຮຽນ ໄດ້ຮັບການປັບປຸງດີຂຶ້ນເທື່ອລະກ້າວ ພ້ອມກັນນັ້ນໄດ້ແບ່ງເບົາຄວາມທຸກຈົນຄອບຄົວທຸກ, ຄອບຄົວມີເວລາ ເສດຖະກິດຕົນເອງຫລາຍຂຶ້ນ.
ທ່ານ ຢານ ເດເບວ ຜູ້ອຳນວຍການ ແລະ ຜູ້ຕາງໜ້າຂອງອົງການອາຫານໂລກ ປະຈຳລາວ ໄດ້ໃຫ້ຮູ້ວ່າ: ໃນຕໍ່ໜ້າ, ໂຄງການດັ່ງກ່າວຈະຖືກມອບໂອນໃຫ້ໂຄງການອາຫານທ່ຽງໃນໂຮງຮຽນແຫ່ງຊາດ ໂດຍມີເປົ້າໝາຍສູງສຸດຄືຊ່ວຍ ລັດຖະບານສະໜອງອາຫານທ່ຽງປະຈຳວັນ ໃຫ້ແກ່ເດັກນ້ອຍໃນທຸກໂຮງຮຽນຂອງ ສປປ ລາວ. ພວກເຮົາໄດ້ຮັບການຊີ້ນໍາ ຈາກຄະນະນຳຂອງອົງການອາຫານໂລກ ເພື່ອສຸມໃສ່ວຽກຫຫລຸດຜ່ອນການຂາດສານອາຫານ ແລະ ການຮຽນຮູ້ຂອງເດັກ.
ໂຄງການແມັກກາວັນໂດຂອງ ກະຊວງກະສິກຳສະຫະລັດອາເມລິກາ ໄດ້ລົງທຶນໃຫ້ອົງການອາຫານໂລກ ໃນການສະໜັບສະໜູນໂຄງການອາຫານທ່ຽງໃນໂຮງຮຽນຂອງລັດຖະບານນັບແຕ່ປີ 2008, ດ້ວຍມູນຄ່າການປະກອບສ່ວນ ທັງໝົດເຖິງປັດຈຸບັນ ປະ ມານ 85 ລ້ານໂດລາສະຫະລັດ, ເດັກນ້ອຍໄດ້ຮັບອາຫານທີ່ມີໂພຊະນາການທຸກໆມື້ ໂດຍມີສ່ວນປະສົມຈາກເຂົ້າ, ແກ່ນຖົ່ວແຫ້ງ ແລະ ນໍ້າມັນພືດ ທີ່ລັດຖະບານສະຫະລັດອາເມລິການຳມາຊ່ວຍເຫລືອ ປຸງແຕ່ງໃສ່ກັບຊີ້ນ, ປາ, ໄຂ່, ຜັກ ແລະ ເຄື່ອງປຸງອາຫານ. ຂະນະດຽວກັນ, ອົງການອາຫານໂລກ ຍັງໄດ້ຮ່ວມມືກັບລັດຖະບານ ສົ່ງເສີມບາງກິດຈະກຳໃນຊຸມຊົນ ເປັນຕົ້ນ ສວນຄົວໂຮງຮຽນ, ກິດຈະກຳລ້ຽງສັດຂະໜາດນ້ອຍ ແລະ ໜອງປາ ເພື່ອເພີ່ມສີສັນຄວາມຫລາກຫລາຍຂອງລາຍການອາຫານ ໃຫ້ເດັກນ້ອຍນັກຮຽນ.
ຂ່າວ: ສົມຫວັງ

Leave a Reply

Your email address will not be published.